Ака уйӑхӗн 25-мӗшӗнче чăваш чĕлхи кунне тата И.Я. Яковлев çуралнăранпа 175 çитнине халалласа Упи шкулӗнче «Яковлев хунавĕсем» ача-пăча пĕрлешĕвĕн фестивалĕ иртрĕ. Уява Максим Петровпа Аня Константинова ертсе пычĕç.

 Чи малтанах параппан сассипе «Яковлев хунавĕсем» пĕрлешĕвĕн ялавне йăтса кĕчĕç. Унтан организацин гимнĕ янăрарĕ. 6-мĕш класс ачисем чăваш чĕлхи çинчен сăвăсем вуларĕç, «Чăваш ачи» юрра тулли кăмăлпа юраларĕç. Малалла пӗрремӗш тата тӑваттăмӗш класра вĕренекенсене «Яковлев хунавĕсем» ача-пăча пĕрлешĕвне илчĕç. Ачасем И.Я. Яковлев халалласа хăварнă пилсене çирĕппĕн асра тытма, тăрăшса ĕçлеме, ырă чунлă пулма, ватă çынсене хисеплеме, тăван çĕршыва чунтан юратма сăмах пачĕç.

Шкул директорĕ Галина Германова тата Упи культура çурчĕн ĕçченĕ Сергей Петров пурне те уявпа саламларĕç. «Ылтăн уçă» театр кружокне çÿрекенсем чăвашла сценкăсем лартса савăнтарчĕç.